Младите крушевчани учествуваа на настанот „Говориме различно, танцуваме исто“

На градскиот плоштад во Крушево 50-тина деца од различна етничка и верска припадност синоќа учествуваа на настанот „Говориме различно, танцуваме исто“ во рамките на фондот „Градиме мостови“.

Под раководство на инструкторката Олгица Николовска од Битола, децата покажаа дека музиката и играта не спојува сите. Пред присутната публика младите играа зумба и прочитаа пораки за мир, пријателство и соживот од Тоше Проески на трите официјални јазици во Општина Крушево: македонски, албански и влашки.

Настанот се одржа во организација на ООУ „Никола Карев“ од Крушево, Здружението на граѓани „Академик“ и Општина Крушево. Финансиски беше поддржан од фондот „Градиме мостови“, кој е заеднички проект на Министерството за образование и наука, амбасадите на Швајцарија и Холандија и Мисијата на ОБСЕ во Скопје.