Минов:Граѓаните на Карбинци заслужуваат модерна, урбанистички и инфраструктурно уредена општина

Граѓаните на општина Карбинци заслужуваат да живеат во модерна, урбанистички и инфраструктурно уредена општина, ветуваме квалитетна инфраструктура, подобро и поквалитетно образование, поголема детска и социјална заштита, чиста и здрава животна средина, изјави Зоран Минов, кандидат за градоначалник на ВМРО-ДПМНЕ и коалицијата за општина Карбинци.

- Со сите проекти кои ги реализиравме во изминатите четири години, ликот на нашата општина е целосно променет. Исполнетите ветувања за изградба на прочистелна станица, зелен  пазар, детска градинка, мостови, уредувања на речно корито, изградба на улици, изградба на спортски терени, реконструкции на училишта и јавните објекти придонесоа за подобри услови и повисок стандард за живеење. Индустриските зони кои ги направивме веќе ги даваат своите резултати. Така и ќе продолжиме, изјави Минов.

Посочи дека ќе се посвети на изградба на сточен пазар, изградба на градинка во село Радање, урбано уредување на одводен канал во село Долни Балван, изградба и уредување на рекреативно езеро кај археолошки локалитет Баргала, изградба на филтер станица на хидросистемот Злетовица, изградба на регионален водоводен систем Плачковица, изградба на локални патишта, како и асфалтирање на преостанатите улици во населените места на општина Карбинци.

- Општина Карбинци бележи економски раст, станавме општина во која започнаа да се отвораат нови работни места. Станавме општина која е препознатлива по големиот број на реализирани проекти, проекти од значење за сите граѓани. Сите заедно ќе продолжиме да работиме за Општина Карбинци каква што ја сакаме и заслужуваме. Секогаш работа, секогаш Македонија, рече Минов.