Министрите Јолевски и Стропницки во посета на безбедносните сили на македонско-грчката граница

Министрите за одбрана на Македонија и на Чешка, Зоран Јолевски и Мартин Стропницки, денеска во Гевгелија ги посетија безбедносните сили на двете држави кои заеднички се распоредени на четири точки за да ја обезбедуваат македонско - грчката граница од евентуален нов бегалски бран.

Јолевски и Стропницки беа и во обиколка на ПТЦ Гевгелија и граничниот камен 59.

- Како армија сме целосно подготвени за сите можни сценарија.Имаме развиено планови и логистички сме подготвени да одговориме соодветно доколку се зголеми бројот на мигранти на нашата граница, нагласи Јолевски и потенцира дека тоа ќе зависи од имплементацијата на договорот меѓу ЕУ и Турција.

Јолевски додаде дека како сериозна држава треба да бидеме подготвени за секакво сценарио и оти во моментот никој не може да каже како понатаму ќе се развива и тече бегалската криза.

Чешкиот министер за одбрана Мартин Стропницки е согласен дека заедничката соработка на ова поле треба да продолжи и да се продлабочува во иднина и покрај тоа што до пролет, подвлече, не очекува драматичен пресврт околу бегалската криза.

- Тука сум затоа што сметам дека и ние треба да и помогнеме на Македонија со потребни материјални средства и човечки ресурси.Не е коректно ниту пак праведно Македонија да биде оставена сама во оваа тешка состојба во која се најде од другите членови,истакна Стропницки