Министерот Адеми се сретна со холандскиот амбасадор Пломп

Министерот за образование и наука Абдилаќим Адеми денеска се сретна со амбасадорот на Кралството Холандија, Ваутер Пломп.

На оваа прва средба, министерот Адеми му го честиташе именувањето на Пломп за амбасадор на нашата земја, истакнувајќи дека добрата соработка во областа на образованието и науката ќе продолжи и во иднина, соопшти МОН.

Министерот Адеми и амбасадорот Пломп позитивно ја оценија досегашната соработка меѓу двете земји во областа на образованието и науката, истакнувајќи ја пред се соработката во областа на високото образование, при што се оцени дека договорите кои ги имаат нашите универзитети со холандските дадоа позитивен ефект, но исто така има и можност нашите студенти да студираат во Холандија.

Адеми го информираше амбасадорот Пломп и за активностите и проектите кои се реализираат во Министерството за образование и наука, за приоритетите во програмата на Министерството, за спроведувањето на Стратегијата за интегрирано образование, реформите во Педагошкиот факултет и модернизацијата на средното стручно образование.

Амбасадорот Пломп позитивно го оцени ангажирањето на министерот за зголемување на квалитетот во образованието, исто така потенцираше дека преку образованието полесно може да се пристапи до европските вредности но и да се подготват младите генерации за процесите на интеграција.

Тој се интересираше и за спроведувањето на проектот „Градиме мостови“ кој има за цел приближување на учениците од различна етничка припадност и меѓусебно познавање со што ќе влијае за отстранување на бариерите и стереотипите меѓу младите. Кралството Холандија ќе продолжи да го поддржува Министертвото за образование и наука во спроведување на приоритетите кои имаат за цел интегрирањето на младите генерации во општеството, нивното знаење и потготвување на идните граѓани на обединета Европа, стои во соопштението.