Мигранти од Хиос се обиделе да се вратат во Турција

Двајца бегалци, кои пред два месеци побарале азил во Грција, но нивните апликации се уште не се разгледани, украле чамец и се обиделе од Хиос да се вратат во Турција, јави дописникот на МИА од Атина.

Еден 32-годишен Сириец и 28-годишен Египќанец вчера украле чамец од пристаништето Светa Хермиона на Хиос и отпловиле кон турскиот брег. Сепак, тие биле забележани од патролен брод на Фронтекс и биле вратени назад на островот. Двајцата бегалци се уапсени и обвинети за кражба, додека пловилото било вратено на сопственикот.

Во меѓувреме, во последните 24 часа на Хиос пристигнале вкупно 52 мигранти и бегалци, додека на Лезбос и Самос не се регистрирани нови пристигнувања.

Полицијата соопшти дека на Лезбос, Хиос и Самос денеска се регистрирани 9.921 бегалци и мигранти, и за првпат по подолго време оваа бројка е под 10 илјади.