Меѓународна научна конференција „Минатото на јазичниот свет - денес и утре“

„Минатото на јазичниот свет – денес и утре“ е насловена втората меѓународна научна конференција која денеска и утре ја организира Институтот за македонски јазик „Крсте Мисирков“ во рамки на Отворените денови кои се одржуваат од 13-ти до 17 ноември.

На конференцијата се најавени 68 учесници, 33 повеќе од првата меѓународна конференција минатата година. Покрај од Македонија, ќе учествуваат лингвисти од седум земји: Босна и Херцеговина, Косово, Полска, Русија, Словенија, Србија и Хрватска.

- Бројот од седумдесетина научни работници, еминентни професори, ветува богата програма и нови научни сознанија од македонистиката, славистиката и воопшто од лингвистиката, изјави Лидија Тантуровска, претседателка на Организацискиот одбор на конференцијата.

Во три паралелни сесии во двата дена од конференцијата учесниците ќе дискутираат на разновидни теми од граматика, лексикологија, фразеологија, историја, дијалектологија, социолингвистика на македонскиот јазик во споредба со други словенски и несловенски јазици.

На отворањето на конференцијата денеска ќе биде промовиран и Хрватско-македонски речник. Покрај работен дел, за учесниците ќе има и факултативна посета на Маврово.