Мажите над 50 години да одат на уролошки преглед еднаш годишно

Мажите да не пуштаат мустаќи само во номеври, туку да се грижат за своето здравје во текот на целата година. Лекарите алармираат дека ракот на простата не дава симптоми на почетокот,  а кога ќе почне да боли е веќе во напредна фаза. На крајот на месецот посветен на машкото здравје, во геријатриската болница во Скопје со бесплатни уролошки прегледи сакаат да промовираат поголема свест за рана дијагноза и навремена проверка кај уролог. 

- Не само ноември, туку секој месец да биде како ноември и мажите да се свесни за своето здравје особено постарата популација. Над 50 години би требало еднаш годишно да одат на уролошки преглед а тие што имаат фамилијарна анамнеза би требало и од 45 години па и порано, вели д-р Дарко Марковски, уролог во ГОБ 8-ми септември.

Пред специјалистичките ординации на Геријатрија имаше гужва од мажи дојдени за превентивните прегледи за машкото здравје. Најголем дел од нив според информациите од лекарите за прв пат се сретнале со уролог. 

- Да ја подигнеме свеста кај мажите кои не сакаат да доаѓаат на прегледи, уште помалку на уролог. Но тоа е едиснтвениот начин каде ќе можат да се прегледаат и да се спречат навреме катастрофалните последици по нивното здравје, вели д-р Ленче Нелоска, директор на ЈЗУ Специјализирана болница за геријатриска и палијативна медицина

- Дојдов да дадам поддршка, да ја развиеме свеста кај сите, во овој случај кај нас мажите за превентивните прегледи. Превенцијата е многу важна, вели Сотир Лукровски, градоначалник на Карпош. 

Лекарите велат дека мажите не се лоши пациенти, туку медицинската култура да биде развиена на повисоко ниво. Превентивните прегледи спасуваат живот а појавата на крв во урината, зголемена фрекфенција на мокрење и болки при седење се аларм за мажите да одат на уролог.