Мас: Важно е дека Иран разјасни, треба да продолжи истрагата

Германскиот министер за надворешни работи Хајко Мас, откако Иран соопшти дека ненамерно го соборил украинскиот патнички авион, го повика Техеран да преземе соодветни мерки за натамошна истрага на оваа „ужасна катастрофа“.

– Важно е дека Иран разјасни. Сега треба да се преземат соодветни мерки за натамошна истрага на оваа ужасна катастрофа со цел никогаш повеќе тоа да не се повтори, истакна Мас.

Иран денеска соопшти дека војската на таа земја „ненамерно го соборила“ украинскиот патнички авион, нагласувајќи дека станува збор за човечка грешка.

Во меѓувреме, командантот на иранската Револуционерна гарда, генерал Амир Али Хаџизаде изјави дека неговата единица презема „целосна одговорност“ за ненамерното соборување на украинскиот патнички авион.

Во своето обраќање на државната телевизија, Хаџизаде нагласи дека кога дознал за соборувањето на авионот, при што загинаа 176 патници и членови на екипажот, „посакал да биде мртов“.