Макрон: Франција истовремено треба да се бори со геополитичките и терористичките закани

Франција во исто време треба да се бори против геополитичките закани и заканите од терористите, изјави францускиот претседател Емануел Макрон на отворањето на новата централа на Главната дирекција за внатрешна безбедност (контраразузнавачка служба) во Сент Уен.

Тој наведе дека изминатите денови во дебатите слушнал дека не постои геополитичка закана.

– Тие луѓе не ги следат актуелните настани, дефинитивно, посочи Макрон алудирајќи на изјавата на лидерката на Национален собир, Марин Ле Пен, која мината недела изјави дека основната закана по Франција не е од Москва, туку од исламскиот фундаментализам.

Според него „една голема нација не може да избира, но мора да одговори“.

– И не може да избере да се бори против новите геополитички закани или против заканите на теренот создадени од терористите. Мора да ги направи и двете во исто време. Тоа е токму она што го правиме. Во време кога се менува рамнотежата во светот, кога се оддалечува она што го мислевме дека е постигнато и кога се приближува она што изгледаше исклучено, мораме вистински да ги браниме непроменливите вредности на нашата Република, посочи Макрон.