Македонските компании заинтересирани за иновациите

Македонските компании се заинтересирани да инвестираат во иновациите и да ги прошират своите бизниси, но понекогаш им се потребни финансиски средства кои можат да ги обезбедат преку Фондот за финансирање на иновативни бизниси формиран од страна на Развојната фондација „Кримсон“ и Агенцијата на САД за меѓународен развој (УСАИД).

Според генералниот директор на Развојната фондација „Кримсон“, Мајкл Голд, македонските бизнисмени имаат најголем интерес за иновации во прехранбената индустрија, градежниот, ИКТ и енергетскиот сектор. 

- Македонските бизнисмени се подготвени да ги прошират своите бизниси и да понудат нови услуги и производи на македонските потрошувачи, меѓутоа честопати тие немаат финансии за опрема, маркетинг и.т.н, изјави Голд.

Фондот за финансирање на иновативните бизниси, како што посочи директорот на УСАИД, Џејмс Стајн, е  целосно самоодржлив и може да се финансира од камати и надоместоци со што се обезбедува можност за постојан развој на малите и на средните претпријатија.

- Главна цел ни е економскиот раст и зголемувањето на вработувањето во Македонија и како УСАИД ќе продолжиме со давањето поддршка во оваа насока, истакна Стајн.

Фондот за финансирање на иновативни бизниси е специјализиран револвинг фонд во износ од 300 илјади долари, наменети за поддршка на иновациите и претприемништвото во Македонија. Од 2012 година кога е формиран Фондот досега се поддржани 12 нови бизниси, а од 2003 година откога е присутена Развојната фондација „Кримсон“ во Македонија поддржани се 400 бизниси.