Македонците од Гора добија асфалтен пат

Македонците од областа Гора, во северозападниот дел на Албанија, конечно добија асфалтно поврзување со градот Кукс.

- Заврши асфалтирањето на патот од Шиштавец до Кукс во должина од 17 километри, финансирано од албанската влада. Македонците не го кријат задоволството. Велат дека сега им е многу олеснета комуникацијата, бидејќи иако должината на патот не е голема, сепак поради несоодветната инфратруктура патувале со часови за да стигнат до Кукс, а во зимскиот период поради големите снежни врнежи, по кои е познат овој крај, останувале отсечени од светот со недели, наведува електронското издание на весникот „Илинден“.

Во изминатите две и пол децении, според истиот извор, малку е инвестирано во оваа област, која ја сочинуваат девет населени места Шиштавец, Борје, Црнелево, Оргоста, Очикле, Кошаришта, Запот, Пакишта и Ново Село. Оваа заедно со областите Мала Преспа и Голо Брдо се три етнички области каде што живее голем број македонско насление.

Патната инфраструктура и понатаму е во многу лоша состојба зашто се уште нема асфалтни патишта во областа. Поради немањето основни услови за живот и екстремно големата невработеност, присутна е масовна миграција на населението, која мал број од наслението однесе во Кукс и други поголеми градови во северниот дел од земјата а поголемиот дел во западно европските земји.

До лани областа имаше две општини Шиштавец и Запот, а со новата територијална поделба тие се укинаа и се припоија кон Кукс. Барањето на Македнците да остане една општина Гора не беше прифатено.