Мајката на Вања бара судење зад затворени врати

Исклучување на јавноста и судење зад затворени врати на случајот за убиството на Вања Ѓорчевска и Панче Жежовски, побарала мајката на Вања, Зорица Ѓорчевска.

Ова во судница го посочи обвинителката Жаклина Крстевска-Јосифовска. Според неа, мајката на Вања сакала да го заштити нејзиниот приватен живот, но и животот на втората ќерка, а притоа, и здравјето оти медиумските известувања за овој случај и влијаеле.

„Пред да одржам воведен говор, сакам да истакнам предлог за исклучување на јавноста од целата главна расправа бидејќи исклучувањето на јавноста е потребно за заштита на приватниот живот на оштетената Зорица Ѓорчевска, мајка на починатото дете Вања Ѓорчевска, кое како дете жртва на кривично дело има права кои треба да се почитуваат“, рече обвинителката Жаклина Крстевска Јосифоска.

Според неа, мајката Ѓорчевска сакала јавност да нема додека се суди и се обелоденува како се случило убиството на нејзината ќерка Вања Ѓорчевска.