ЛШ: Металург се прости со победа

Ракометарите на Металург со победа ги завршија настапите во Лигата на шампионите во сезоната 2016/2017. Металург, во последното 10.коло во Ц групата, славеше над Чеховски Медведи 31:24 (15:10).

 

Посакуваа и најавуваа победа во пресрет на натпреварот со Чеховски Медведи и по 60 минути сигурна игра ракометарите на Металург успеаја со победа да ја завршат тековната сезона во шампионската Лига.

 

Избраниците на Лино Червар одиграа добар натпревар, без осцилации, со добра одбрана и минимум на технички грешки во нападот. За таквиот пристап младиот тим на Металург и беше награден со победа.

 

Од првата до последната минута Металург водеше, по почетните 3:0, на половина од првиот дел имаше предност од пет гола (8:3), во 26.минута и 14:8, а на полувреме 15:10.

 

Во првиот дел блескаше на голот на Чеховски Медведи ветеранот Грамс со осум интервенции, а неговите сиграчи во нападот не беа миленици на среќата бидејќи шест пати ја погодуваа рамката на голот.

Металург и во вториот дел одигра на високо ниво, рутински го држеше противникот на разлика од три до пет гола, а во 56.минута ја достигна највисоката преднст од седум голови 29:22.

 

Илиќ и Обрадовиќ со по седум голови го предводеа Металург, кој Лигата на шампионите ја заврши со пет победи и исто толку порази. Прво име во составот на Чеховски Медведи беше голманот Грамс со 13 интервенции.

 

Групата Ц ја освои Монпелје со 16 бодови пет повеќе од Ла Риоха и шест од Металург, а следуваат Татран Прешов со 9, Елверум со 8 и Чеховски Медведи со шест бода.