ЛШ: Лестер и Јувентус во четвртфиналето

Екипите на Лестер и на Јувентус се пласираа во четвртфиналето од Лигата на шампионите откако вечерва во реванш дуелите постигнаа победи против Севиља односно Порто.

Лестер направи успех откако ја надополни негативата од првиот дуел(1-2) со Севиља и на домашен терен победија со 2-0 и со вкупни 3-2 го елиминираа ланскиот победник на Лига Европа. Стрелци на головите беа Вес Морган во 27.минута и Албрајтон во 54.минута.

Севиља дуелот го заврши со 10 играчи откако беше исклучен Насри, а во 78.минута гостите не реализираа пенал. Ударот на Нзонзи, Шмајхел го одбрани.

На дуелот во Торино Јувентус го победи Порто со 1-0 и со вкупни 3-0 го елиминира тимот од Португалија.Стрелец на голот беше Дибала во 42.минута од пенал.

Пласман во четвртфиналето имаат обезбедено: Баерн, Барселона, Реал Мадрид, Борусија Дортмунд, Лестер и Јувентус.

Утре се играат последните реванш дуели: Атлетико Мадрид - Баер Леверкузен (4-2) и Монако - Манчестер Сити (3-5).

Извлекувањето на двојките за 1/4 финалето ќе се одржи на 17.март (петок) во Нион.