Лекари без граници: Изјавата на авганистанската Влада е „одвратна“

Хуманитарната организација „Лекари без граници“ (МСФ) остро ја осуди изјавата на авганистанската Влада по повод нападот на коалициските сили, предвидени од САД, врз болницата во градот Кундуз, во кој загинаа 22 лица.

- Оправдувањето на еден ваков напад е одвратна работа, се вели во соопштението на Лекари без граници, во кое уште се имплицира дека во таквата постапка на официјален Кабул има елементи на „признавање на воено злосторство“.

Во воздушен напад врз локалната болница во овој авганистански град, извршен во саботата, беа убиени 12 луѓе, членови на персоналот на МСФ, како и десетмина пациенти.

Авганистанското Министерство за одбрана соопшти дека „вооружени терористи“ ја користеле болницата како упориште, од каде вршеле напади врз позициите на авганистанската армија и врз цивилите во градот, со што се обиде да го оправда нападот.

Хуманитарната организација за нападот ги обвини само силите на НАТО, тврдејќи дека „САД и авганистанските власти одлучиле да се бомбардира болницата„ верувајќи дека во неа има талибаци“.

Во издаденото соопштение, МСФ наведува дека никој од персоналот не дал информации за какви било борби во болницата.

Американскиот Пентагон од своја страна соопшти дека започнал „темелна и сеопфатна истрага“ за овој тежок инцидент.

Авгнистанските сили, подджани од меѓународната коалиција, што ја предводат САД, се ангажирани во борбата против талибанците, кои на почетокот од минатата недела го зазедоа градот Кундуз во истоимената провиција на северот од земјата.

Градот, кој има стратешко значење за тој дел од Авганистан, е првото поголемо место што талибанците го освија по 2001 година.