Концерт на тапанарот и композитор Гоце Стевковски во Њујорк

Во Македонскиот културен центар во Њујорк „Gallery MC“ вчеравечер концерт одржа тапанарот и композитор Гоце Стевковски. Тој првпат го претстави последниот материјал насловен „7 приказни” пред публиката во САД, каде што премиерно беа промовирани и неколку нови композиции како најава на албумот кој следува.

Здружението на џез музичари и слободни уметници соопшти дека за овој настап покрај неговата редовна соработка со музичарите од Македонија - Кирил Кузманов (саксофон), Сашко Николов (тромбон) и Кирил Туфекчиевски (контрабас), Гоце Стевковски остварил и меѓународна соработка со пијанистот Матијас Гајер и гитаристот Таулант Мехмети кои, како што наведува Здружението, внеле дополнителна енергија на концертот.

Проектот беше поддржан од Министерството за култура на Република Македонија.