Концерт на староградска музика во Струмица

Во Центарот за култура „Антон Панов“ вечерва ќе се одржи осмиот по ред фестивал на староградски песни и серенади „Под кулите на Струмица“. Песни за љубовта, меракот, копнежот ќе испеат шест хорови и оркестри кој го негуваат стариот македонски мелос, „Распеани струмичани“ од Струмица, „Распеани паланчани“ од Крива Паланка, женската пејачка група „Камелија„ од Свети Николе, „Распеани радовишани“ од Радовиш, „Распеани валандовчани“ од Валандово и вокалниот октет од Прилеп.

- Поминаа 8 години од првиот фестивал на староградски песни и серенади, при што може да ја парафразираме мислата на еден голем мислител, кој вели дека од мислата станува збор, зборот дело, од делото станува навика, од навиката станува карактер, а од карактерот станува судбина. Можеби судбината на колевката на културата- Струмица, била и ќе биде да продолжи традицијата на убави нешта во културното живеење, вели проектниот менаџер Елисавета Василева- Бончева.

На фестивалот ќе бидат испеани дваесетина староградски песни, кои се доказ за народниот гениј како непресушен извор на убави староградски пеења и серенади.