Комисиска расправа за предлог законите за високи раководители и за соодветна и правична застапеност

Во Собранието денеска ќе заседаваат Комитетот за односи меѓу заедниците,  како и комисиите за прашања на изборите и именувањата, за политички систем и односи меѓу заедниците и за финансирање и буџет.

За расправа пред Комисијата за политички систем и односи меѓу заедниците се Предлог законот за високи раководители, во прво читање, како и Предлог законот за соодветна и правична застапеност, исто така во прво читање. 

Комитетот за односи меѓу заедниците ќе одлучува за спроведување на постапката на гласање при донесување на Предлогот на закон за соодветна и правична застапеност. 

Најавени се две седници на Комисијата за за прашања на изборите и именувањата, а на првата ќе се одржи Јавна расправа за утврдување на предлог - листа од пријавените кандидати по Одлуката за објавување јавен оглас за избор на член на Комисијата за спречување и заштита од дискриминација. Таа комисија на одвоена седница, треба да утврди и предлог - одлука за изменување на Одлуката за избор на претседател, членови и нивни заменици на Комисијата за следење на соодветна и правична застапеност на граѓаните кои припаѓаат на сите заедници, како и предлог одлука за разрешување и именување на претседател и членови на Одборот за доделување на државната награда „8 Септември” и предлог-листа за избор на член на Комисијата за спречување и заштита од дискриминација.

Комисијата за финансирање и буџет, пак, ќе расправа за Предлог законот за изменување и дополнување на Законот за данокот на додадена вредност - во прво читање.

МИА