Ќе се утврдува дали имало пропуст во лекувањето на кумановецот кој почина вчера по алергиска реакција од аналгетик

Државниот санитарен и здравствен инспекторат (ДСЗИ) и екипа од Министерството за здравство ќе утврдуваат дали имало пропуст во лекувањето на пациентот кој почина вчера во Општата болница Куманово, според првично објавените информации, по алергиска реакција од аналгетик.

Министерот за здравство Арбен Таравари денеска изјави дека ќе има одговорност доколку има лекарски пропуст.

- За пациентот од Куманово сум известен од вчера, во тек сум. Да бидам искрен анафилактички шок се случува секаде и може да се случи секогаш. За жал, некогаш анафилактичкот шок може да заврши и да почине пациентот. Според информациите што ги имам пациентот имал анафилактички шок, можеби се знаело можеби не се знаело за некој лек, некој лек може го примал пациентот порано и да не бил и да не реагира промпно имунолошка реакција да има организамот. Веќе од наутро е потпишано да оди Државната санитарна инспекција, се надевам дека се таму, после еден или два часа ќе оди и професионалната екипа од Министерството за здравство да ги видат сите детали и ќе ве известиме. Доколку има лекарски пропуст сигурно ќе има и одговорност, рече Таравари, на новинарско прашање на прес-конференцијата за најновата состојба на пациентите од пожарот во Кочани.

Триесет и двегодишниот кумановец  кој се јавил во Kумановската болница поради стомачни болки починал во 11 часот вчера, а обидите за реанимација биле неуспешни. По наредба на јавен обвинител телото е предадено за обдукција. Полициски службеници од СВР Куманово извршиле увид и извршиле разговор со сите присутни медицински лица.