Киш ќе пее на финалето од ЛШ

Европската фудбалска унија (УЕФА) во средата објави дека пред почетокот на финалниот меч во Лигата на шампионите, кој на 28. мај ќе се одигра во Милано, свој настап ќе има американската музичка ѕвезда Алиша Киз (35).

 

Првпат оваа сезона за финалето во Лигата на шампионите УЕФА воведува церемонија на свечено отворање, пренесот ќе се врши во 220 земји, а во живо се очекува да го проследат околу 180 милиони гледачи.

 

Алиша Киз, добитничка на петнаесет Греми награди, на свеченото отворање ќе настапи со песни од нејзиниот најнов албум.

 

„Многу сум возбудена што своите нови песни ќе ги изведам во пресрет на финалето во Лигата на шампионите, настан кој се следи во сите делови од светот. Ми претставува чест што ќе можам да се здобијам со едно такво искуство“, рекла американската пејачка.

 

Во финалниот меч во Лигата на шампионите ќе играат победниците од полуфинални пресметки, во кои играат Манчестер Сити - Реал Мадрид и Атлетико Мадрид - Баерн Минхен.