Кисела Вода обезбеди униформи за сите 5460 ученици

Општина Кисела Вода соопшти дека денеска на првиот училишен ден од Второто полугодие започна со достава на униформите за  5460 учениците од основните училишта на своја територија. Сите основци од прво до деветто одделение, бесплатно добиваат униформа која има унифицирана боја за секое од осумте училишта.

Како што потенцира градоначалникот Орце Ѓорѓиевски, оваа мерка е уште еден од чекорите за обезбедување еднакви можности за сите деца и овозможување на позитивен детски развој.

-Униформите ќе создадат рамнотежа и единство меѓу учениците, независно од финансиските можности на нивните родители. Овозможувајќи бесплатни униформи за сите, го намалуваме ризикот од дискриминација и креираме рамка каде сите ученици се почитуваат и прифаќаат, вели Ѓорѓиевски.

Тој појасни дека одлучиле секое училиште да има различна боја на униформа, со што креираат  заеднички идентитет за учениците и го поттикнуваат  чувството на припадност кон сопственото училиште.

- На овој начин ги подигнуваме и безбедносните стандарди во училиштата. Препознатливоста на униформата го прави веднаш воочливо присуството на лица кои не се дел од тоа училиште, со што се прави превенција од несакани ризици. Образованието претставува столб на нашето општество и ние како локална самоуправа ќе продолжиме со инвестиции во образовните институции што дополнително ќе ги зголемат можностите и перспективите за нашите ученици, најави Ѓорѓиевски.

Воедно покрај  бесплатните униформи за сите ученици, Општина Кисела Вода и оваа учебна година обезбеди ранче за секое прваче, а бројни се и проектите за финансиска поддршка на учениците од социјален ризик-бесплатни ужинки, курсеви и спорт, како и бесплатно летување.