ЈП „Водовод“ Куманово пријави вработена за проневера на пари

Вработена во јавното претпријатие „Водовод“ Куманово е пријавена за проневера на пари, соопштија денеска надлежните од претпријатието. Од СВР Куманово потврдија дека писмено било пријавено од страна на јавното претпријатие „Водовод“ за наводна проневера на пари. Оттаму соопштуваат дека истрагата е во тек.

-При спроведување на годишен попис за 2024, забележано е несовпаѓање во сметководствена документација (каса прими). Пописната комисија направи детална анализа, проверена е целосна документација на главна благајна и утврдени се неправилности во работењето. Комисијата детално ги утврди неправилностите, односно увиде дека дел од средствата од главната благајна не се внесени во банка. По констатирање на неправилностите, случајот е пријавен во полицијата во отсек за економски криминал. Очекуваме брза разрешница и им стоиме на располагање на надлежните институции. Граѓаните, наши корисници не се оштетени, сите кои си платиле сметки се евидентирани и си стојат нивните платени сметки. Штета нема врз граѓаните и правните субјекти, туку исклучива е на јавното претпријатие, изјави директорот на ЈП Водовод, Оливер Стојмановски.

Денеска преку соопштение реагираа од локалната СДСМ од каде побараа од градоначалникот да одговори кои мерки се преземени за да се спречи кражба од јавните претпријатија, има ли механизам за контрола, какви кадри се вработуваат и какво е нивното образование и стручност.