Јапонија го зголемува буџетот за одбрана за следната година

Министерството за одбрана на Јапонија одобри рекорден буџет од 51 милијарда долари за следната година, изјави денеска официјален претставник на Владата кој бил вклучен во планирање на буџетот.

Западните медиуми коментираат дека со тоа дополнително се засилуваат тензиите во Кинеско Море и во Северна Кореја, која ги зајакнува своите ракетни погони, пренесува Танјуг.

Британските медиуми наведуваат дека растот од 2,3 отсто во однос на годинешниот буџет го побарало Министерството за одбрана за да ја засили својата одбрана во согласност со развојот на севернокорејската технологија на балистички ракети.

Неименуван извор потврди дека Министерството бара зголемување на буџетот од 100 милијарди јени за да го унапреди јапонскиот „ПАЦ-3“ ракетен систем за одбрана.

Предлог буџетот ги вклучува и трошоците за производство на блокот IIА верзијата на системот „Стандард Мисл-3“, што ќе се унапредува во соработка со САД.

Во зголемувањето на буџетот се вклучени и трошоците за засилување на јапонската крајбрежна стража на јужните острови Микојима и Амами Ошима, за да се обезбедат од активностите на соседна Кина.