Јакимовски: Владата да и го додели комплексот Етно село во Нерези на Општина Карпош

Владата да и го додели комплексот Етно село во Горно Нерези на Општината Карпош, повика денеска кандидатот на ГРОМ за градоначалник на Карпош, Стевчо Јакимовски.

Јакимовски нагласи дека е жално да пропаѓа таков објект кој може како да се искористи во интерес на граѓаните на Карпош, но и на цела држава.

Со повторното враќање во живот на Етно село, според него, не само што ќе се зголеми бројот на домашни и странски туристи во Општината, туку и ќе се придонесе за нови вработувања.

– Не е ли жално на толку вложени народни пари овој објект да биде затворен? Да не биде на туристичката мапа на Карпош, на Скопје и на Република Македонија? Педесетина луѓе да ги изгубат своите работни места? Ако Владата на Република Македонија не е подготвена да го стави објектот во функција, да го доделат на Општина Карпош. Сакаме овој објект да го ставиме во функција, да биде во интерес на граѓаните на Карпош и на Скопје. Да биде интересен објект за туристите кои доаѓаат овде во
нашиот град и во исто време да креираме нови педесетина работни места, вели Јакимовски.