Израел и Иран продолжуваат да разменуваат воздушни напади преку ноќ

Израелската армија рано утрово соопшти дека Иран започнал нов ракетен напад врз Израел. Сепак, се чини дека израелската воздушна одбрана успеала да ги неутрализира ракетите, бидејќи досега нема извештаи за ракетни удари, наведува ДПА.

Кратко по предупредувањето, армијата објави дека жителите можат безбедно да ги напуштат засолништата за бомби.

Во меѓувреме, израелските воздухопловни сили започнаа серија напади врз „ракетни складишта и места за лансирање“ во централен Иран, соопшти израелската армија на Телеграм. Доцна синоќа, израелската армија, исто така, објави напади врз ракетни лансери во западен Иран.

Ова е втора недела во која израелските сили напаѓаат цели во Иран, а Техеран одговори со ракетни напади и напади со дронови.

Според израелските проценки, нападите на Израел врз Иран го одложија развојот на нуклеарно оружје на Исламската Република за неколку години.

-Мислам, врз основа на проценките што ги слушаме, дека веќе ја одложивме нивната способност да добијат нуклеарна бомба за најмалку две или три години, изјави вчера израелскиот министер за надворешни работи, Гидеон Саар, во интервју за германскиот таблоид „Билд“. „Веќе постигнавме многу. Но, ќе направиме сè што можеме. Нема да застанеме додека не направиме сè што е можно за да ја елиминираме оваа закана“, додаде Саар.

Од своја страна, иранскиот министер за надворешни работи, Абас Арагчи, кој се сретна со врвни европски дипломати во Женева, рече дека Иран нема да преговара за својата нуклеарна програма сè додека Израел не ги запре нападите.

Сепак, Саар изјави за јапонскиот радиодифузер НХК дека немало напредок во разговорите дури и пред израелските напади, кои почнаа на 13 јуни. „Јас лично не верувам дека Иран бара (дипломатско) решение. Иран се обидува да ја заведе меѓународната заедница“, рече израелскиот министер за надворешни работи.

Американскиот претседател Доналд Трамп вчера изјави дека можеби ќе поддржи прекин на огнот меѓу Израел и Иран „во зависност од околностите“.

На прашањето дали ќе бидат потребни копнени сили за да се победи Иран, Трамп рече: „Нема да зборувам за копнени сили, бидејќи последното нешто што некој сака да го направи е копнени сили“.

Трамп изјави дека во наредните недели ќе одлучи дали САД ќе интервенираат во војната меѓу Израел и Иран. Во своите забелешки, тој се двоумеше помеѓу предлози за брзо дипломатско решение и закани дека САД би можеле да интервенираат на страната на Израел.

Во израелските напади досега загинаа 639 лица во Иран, според новинската агенција на активисти за човекови права (ХРАНА). Израел пријави 24 цивилни жртви во иранските напади.