Инфалцијата во март намалена на месечно ниво, зголемена на годишно ниво

Трошоците на живот во март бележат зголемување од 2,7 проценти на годишно ниво, а цените на мало се зголемени за 2,2 проценти, објави денеска Државниот завод за статистика. Во однос на февруари, трошоците на живот се намалени за 1,3 проценти, а цените на мало за 0,9 проценти.

Намалувањето на инфлацијата во март  е резултат на намалувањето на трошоците на животот во делот на храната и безалкохолните пијалаци за 3 проценти, Транспортот за 1,8 проценти, Мебел, покуќнина и одржување на домаќинствата за 0,6 проценти, Алкохолни пијалаци, тутун и наркотици за 0,5 проценти и Разновидни стоки и услуги за 0,3 проценти.

Зголемување на трошоците на животот во однос на февруари има во групите: Домување, вода, електрика, гас и други горива и Облека и обувки за 0,4 проценти, Ресторани и хотели за 0,3 проценти, Комуникации и Здравје за 0,2 проценти и Рекреација и култура за 0,1 процент. Во групата Образование трошоците на живот остануваат на исто ниво како и во претходниот месец.