Иџе: Не се откажувам од титулата

Македонскиот автомобилст Игор Стефановски – Иџе забележа нова победа и по вчерашниот триумф во Швајцарија е на чекор до одбрана на европската титула во автомобилизам на ридски патеки.

- Ова беше исклучително тешка трка, поради временските услови. Морав да ризикувам на влажната патека бидејќи немам намера да се откажам од европскиот трон. Според моите пресметки потребен ми е уште само еден бод за одбрана на титулата и ќе направам се да го освојам на следната трка во Словенија, изјави Стефановски.

Лани Иџе со победата во Швајцарија ја обезбеди шампионската титула, овојпат не успеа, но и овојпат беше бодрен пред се од македонските фанови.

- Ме израдуваа неколку македонски навивачи кои живеат и работат во Швајцарија и дојдоа да ме бодрат на оваа трка. Убаво е да се види развиорено македонското знаме на трибините. Тоа ми даде дополнителен мотив да дадам се од себе и да извојувам нова победа. Се надевам дека ги исполнив нивните очекувања и дека не зажалија што дојдоа на патеката и беа горди што се Македонци – додаде Стефановски.

До крајот на шампионатот остануваат да се возат уште две трки во Словенија и во Хрватска.