Хованец: Грција не може да ги најде десетте бегалци за Чешка

Прага нема да ги прифати од Атина десетте мигранти, како што беше предвидено со европските квоти за мигранти, бидејќи грчките власти „не можат да ги најдат“.

Ова го изјави чешкиот министер за внатрешни работи, Милан Хованец, додавајќи дека на чешка територија годинава поради безбедносните проверки нема да пристигнат ниту неодамна најавените 80 мигранти од Турција, јави дописникот на МИА од Прага.

Според квотите на Унијата, Чешка до 2017 година треба да прими 2.691 мигранти од медитеранските земји, кои најмногу се погодени со бегалската криза.

До сега земјата понуди преселба на 20 луѓе од Грција и десет од Италија. После безбедносните проверки на крајот од април во Чешка пристигнаа само четири сириски бегалци од Грција.

-Чешка во моментов нема да прима десет луѓе од Грција, бидејќи грчките власти не можат да ги најдат, изјави Хованец.

Според Хованец, поради миграциската криза, земјата се подготвува во догледно време да ја зајакне безбедноста на границите со Германија. Хованец подвлече дека некои германски политичари најавија дека ќе бидат екстрадирани стотици илјади неуспешни баратели на азил и претпоставува дека при масовното заминување можно е некој да сака да остане на чешка територија.