Хоџа: Очекуваме годинава да биде добра и бериќетна за лозарите

Министерот за земјоделство  Арјанит  Хоџа денеска учествуваше во закројување на лозје во неготинско, во чест на денешниот празник ,,Свети Трифун”, кој се смета за заштитник на лозарите и винарите.

-Очекуваме оваа година да биде добра, бериќетна, исто така да може самите лозари да бидат претпазливи во делот на квалитетот што треба за производство на грозјето, а од друга страна, како министер и како одговорен за ресорот за субвенциите, гарантирам дека ќе ја имаат истата помош, истата поддршка од наша страна, изјави Хоџа.

З сите лозари посака годинава да биде бериќетна и добра.

-Да очекуваме дека оваа година ќе биде многу подобра од ланската. Министерството за земјоделство, шумарство и водостопанство, односно Владата докажа дека навистина лозарите и винарските визби се приоритетни. Во таква лоша година како минатата успеавме да ублажиме било какви лоши последици и резултати, донесовме специјален закон за лозарите со тоа што во ковид ситуација од пандемија успеавме да одвоиме над шест милиони евра помош, односно поддршка за лозарството. Исто така и за винарските визби кои за жал беа полни во нивните капацитети во визбите, потсети Хоџа.

Лозарството, нагласи, е навистина стратешка гранка за нашата држава.

-Мора заеднички со дијалог и со лозарите и со откупувачите, односно со винарските визби, да придонесеме за да биде лозарството одржливо, развојно и приоритетно за нашата држава, посочи Хоџа.

Неготинскиот градоначалник, Тони Делков потсети дека во неготинскиот крај нема семејство коешто не се занимава со лозаропроизводителство, дали професионално или како дополнителна дејност.

-Неготино и секој еден наш граѓанин се гордее на виновата лоза, на производството на вино и ракија, додаде Делков, осврнувајќи се на настаните организирани по повод празникот, посакувајќи плодна и успешна година.