Грција се подготвува за невремето „Адел“, во одредени делови на земјата сè уште се пребројуваат штетите од претходниот бран

Западниот и северозападниот дел на Грција, Епир, Јонските острови, се очекува повторно да бидат зафатени од невреме, додека сè уште ги пребројуваат штетите од претходното кон крајот на минатата седмица, а новиот бран под името „Адел“ во следните денови се очекува да ја зафати целата земја, јави дописничката на МИА од Атина.

Според грчките медиуми, на островот Крф, поради новиот бран превентивно се затворени училиштата, додека во планинските делови во Епир и во околината на Јанина, сè уште не се санирани штетите од претходниот бран.

Во Министерството за климатски кризи и цивилна заштита на Грција вчера се одржа состанок на Комисијата за процена на опасности поради најавеното невреме со силни дождови и грмежи, а во текот на денешниот ден се очекува да се одржи нов состанок.

Претходниот бран со обилни врнежи од дожд од четвртокот до саботата ја зафати западна Грција, предизвика поплави, лизгање на земјиштето, штета на домови и на инфраструктурата, а најпогоден беше островот Крф. 

МИА