Грчкиот министер за миграција ја обвинува ЕУ за хипокризија

Грчкиот министер за миграција Јанис Музалас ги обвини денеска државите од ЕУ за хипокризија и лажење во врска со начинот на кој неговата држава се бори со огромниот прилив на мигранти од Турција.

– Оваа приказна дека не ги контролираме нашите граници е лага. Имаме најдобра контрола на границите по море од кој било друг, изјави тој за Би-Би-Си.

Грција на самитот на ЕУ што почнува утре ќе информира за напорите да се регистрираат мигрантите кои доаѓаат во државата.

Музалас истакна дека е лага оти Грција не обезбедила доволно сместувачки капацитети за бегалците. Тој вели дека главна причина за тоа што Вадлата била бавна во регистрацијата и идентификацијата на мигрантите е што ЕУ бавно обезбедувала потребна опрема и персонал.

– Зошто сега имаме голем напредок во регистрацијата од 10 на 90 отсто? Затоа што ни испорачаа машини кои ги баравме – Еуродак (база на отисоци од прсти), вели Музалас.

Тој упати остри критики кон Унгарија и Словенија и неколку други земји во ЕУ кои испратиле полицајци за да им помогнат на македонските власти да патролираат на границите со Грција и спречат мигранти илегално да преминат во Македонија.

– Зарем Грција е непријател на Европа, запраша грчкиот министер.