Граѓанскиот сектор бара да биде вклучен во преговорите за излез од политичката криза

Осумдесетина граѓански организации денеска побараа нивни претставници да бидат вклучени во преговорите за изнаоѓање решенија за излез од политичката криза.

Со тоа, според нив, ќе се обезбеди набљудување на преговарачкиот процес, ќе се гарантира веродостојно презентирање на информациите пред граѓаните, ќе бидат претставени ставовите на граѓанскиот сектор и ќе се понудат решенија кои партиите не би ги имале во предвид.

- Претставниците на граѓанскиот сектор нема да имаат улога, надлежност и мандат да одлучуваат во рамки на преговорите. Тој мандат го имаат партиите кои преку делегирани пратеници во Собранието, треба да ги преточат договорените услови во практични законски решенија коишто потоа, владините институции и независните тела треба да ги спроведат, појаснуваат невладините организации.

Писмото со нивните барања тие го доставија до Делегацијата на Европската унија во Скопје, Американската амбасада и до четирите политички партии вклучени во политичките преговори.