Граѓаните ќе штедат на зимница - теглите со ајвар ќе бидат преполовени

Теглите со зимница ќе се полнат и оваа есен, но нивниот број ќе биде помал од лани. Граѓаните веќе ги започнаа подготовките, но со ограничени количини и прецизни пресметки.

Централното место и годинава ќе го има традиционалниот ајвар, но во многу поскромни количини од вообичаено. Главната причина се поскапувањата. За граѓаните не се скапи само пиперките, туку и зејтинот, дрвата и се што е потребно за да се испече една тава ајвар. За многумина, она што некогаш беше основа на зимницата, денеска веќе станува луксуз.

Дека ќе се прави помалку зимница, потврдуваат и самите пазарџии. Велат раздвиженоста на пазарите ја има, но количините што се купуваат се значително помали од претходните години.

И додека на пазарите често се слуша познатата фраза ,,на купувачот се му е скапо, на продавачот се му е ефтино,, има и граѓани со поинаков став. Тие велат дека цените се реални, особено кога ќе се земе предвид трудот што стои зад секој килограм произведена пиперка.

Годинава куртовската капија, или популарната ајварка  во откупните пунктови се продава по цени од 20 до 50 денари за килограм, во зависност од квалитетот и класификацијата, што е за околу 15 проценти поскапо во однос на лани.

Освен во домашните преработувачки капацитети, голем дел од црвената пиперка оваа сезона се извезува и во Србија, Хрватска и Бугарија.