Градоначалникот Чадиев даде отчет за сработеното во 2015

Градоначалникот на Велес Славчо Чадиев денеска на прес-конференција информира за сработеното во општината во 2015 година.

Според предвидената програма и ветеното на граѓаните, како што рече, биле завршени и во тек се повеќе капитални објекти.

- Продолжи изградбата на експресниот пат Велес-Кадрифаково, пуштен е во сообраќај, реконструирана е Железничката станица во Велес, пуштена е во употреба фабриката „Маркарт“ во индустриската зона Караслари, рече Чадиев. 

Тој потсети дека во градот пуштен е во употреба нов кружен тек на улицата „Благој Ѓорев“, поставен е камен-темелик и скоро целосно е изградена карабината на црквата „Свети Јован Крстител“.

Асфалтирани и поплочени се повеќе улици и тротоари во сите делови на градот. Изградени се неколку паркинг-простори во градот, подобрено е уличното осветлување, реконструирани се повеќе водоводни линии. Изградени се и водоснабдителни ситеми во неколку велешки села, Црквино, Новачани и Сливник, а во село Караслари инсталирана е водоводна пумпа.

- Со цел да го заштитиме населението од поплави, неодамна извршивме и чистење на речните корита на Вардар и Тополка. Реконструиравме и неколку училишта со цел за подобрување на наставиот процес, а за развивање на спортот пуштивме и две тениски игралишта во Градскиот парк, а на фудбалскиот стадион набавивме и илјада нови столчиња и ги реконструиравме спортските соблекувални. Во функција за развој на спортот меѓу младите на село, пуштивме во употреба повеќенаменски спортски игралишта во селото Иванковци и Караслари, а поставивме и повеќе фитнес вежбалници во дворовите на велешките училишта, а се со цел поголема популарност на спортот во градот, потенцира Чадиев.

Чадиев потсети дека почна и постапката за оформување нова индустриска зона „Мамутчево“, извршена е продажба на градежно земјиште и се интензивира процесот на легализација на дивоградбите.

Велес, како што рече, доби и Бизнис-центар, почна реализацијата на проектот „Енерџинет“ и пуштена е во функција и нова Метеоролошка станица и уште многу други проекти.

- Тоа не ќе беше возможно ако не бевме поддржани и поттикнати од Вас почитувани граѓани. Вие сте нашиот коректор во работата и извор на енергија и ни давате и нови идеи и предлози за реализација и подобро функционирање на општина Велес во сите сегменти, на што сум ви благодарам, потенцира Чадиев.