Горан Весиќ најави оставка од функцијата министер за градежништво на Србија

Српскиот министер за градежништво, транспорт и инфраструктура Горан Весиќ најави дека утре ќе поднесе оставка, по несреќата на Железничката станица во Нови Сад кога загинаа 14 лица, а тројца се тешко повредени.

Весиќ најави дека поднесува оставка по трагедијата што се случи во Нови Сад во петокот, кога падна бетонска настрешница на железничката станица, при што загинаа 14 лица, а тројца беа во тешка состојба.

„Не можам да прифатам вина бидејќи немаме ни трошка одговорност за несреќата што се случи. Поднесувам оставка како одговорен човек кој сака да покаже морална одговорност“, изјави Весиќ.

Тој рече дека се вратил во политиката поради претседателот на Србија, Александар Вучиќ и дека ќе му остане на располагање.

„Ќе бидам таму додека тој се занимава со политика“, рече тој.

Весиќ ги нападна и оние од Српската напредна странка, чиј функционер е тој, кои го повикаа да покаже одговорност.

„Имам одговорност и чест и ќе се трудам во наредниот период да покажам колку немаат“, рече тој. Исто така додаде дека е „горд член на СНС“ и дека ќе остане член на Претседателството на таа партија.

Весиќ стана министер за градежништво во 2022 година. Тој е член на Српската напредна партија на Вучиќ од 2013 година. Интересно е што пред тоа беше висок функционер на спротивставената Демократска партија и шеф на кабинетот на егзекутираниот српски претседател Зоран Ѓинѓиќ.