Голем пожар во Вардариште, поради ризик исклучена струјата во делови на Аеродром, Ново Лисиче и Гази Баба

Голем пожар во близина на Вардариште предизвика прекин на струјата во делови од Аеродром, Ново Лисиче и Гази Баба 

Граѓаните на социјалните мрежи бурно реагираат дека пожарот се шири веќе два до три часа и бараат итна интервенција за решавање на ситуацијата.

„На 35 степени, без струја и во чад – не можеме ни прозор да отвориме без да се задушиме“, коментираат револтирани жители.

Од Регионалниот центар за управување со кризи – Скопје информираат дека пожарникарите од Противпожарната бригада се на терен од околу 12 часот, гаснејќи запалена сува трева и отпад во кругот на поранешната депонија Вардариште.

Во интервенцијата се вклучени седум противпожарни возила и најмалку дваесет пожарникари.

Поради ризик од зафаќање на трафостаница и електрични водови, превентивно е исклучена струјата, со што поголемиот дел од Општина Аеродром е без електрична енергија.