Голем интерес за грант за млади земјоделци во Кавадарци и Росоман

Голем интерес има за грант за млади земјоделци кај жители на општините Кавадарци и Росоман. Во Агенцијата за поттикнување на развојот во земјоделството, работна единица Кавадарци, аплицирале 40 лица заинтересирани да почнат да се бават со земјоделство. Од нив, досега на 14 апликанти им било потврдено дека ги исполнуваат условите за добивање на грант до 600 илјади денари. За ова денеска информираше за МИА Драганчо Николов, раководител во кавадаречката филијала на Агенцијата.

- Се работи за млади луѓе на возраст од 18 до 40 години, кои прв пат одлучуваат да се занимаваат со земјоделство, откако најголемиот дел од нив го имаат наследено земјоделскиот имот од своите родители, или пак самите се стекнале со свое земјоделско земјиште. Услов е исто така апликантите да почнале да се занимаваат со земјоделство во последните 18 месеци,  појасни Николов.

Тој соопшти дека грантот најчесто опфаќа набавка на земјоделска механизација за потребите во  земјоделството, лозарство  или овоштарство. Се мисли на трактори, атомизери за заштита на земјоделските  култури, плугови за орање и слично.

Грантовите се исплатуваат во рамките на мерката 112 од  Програмата за рурален развој на Република Македонија.