Главната опозициска партија во Турција не ја прифаќа победата на Ердоган на референдумот

Турскиот опозициски лидер Кемал Киличдароглу изјави денеска дека нема да ја прифати победата на поддржувачите на уставните измени на референдумот, кој вчера се одржа во Турција, напоменувајќи дека гласањето ја изнело вистината на виделина - дека најмалку 50 отсто од луѓето кажале „не“, јави ДПА. 

Лидерот на Народнорепубликанската партија смета дека референдумот за уставни измени е доказ за недостиг на консензус во општеството. 

- Минимум 50 проценти од населението на Турција им кажа „не“ на уставните измени, така што резултатите од тоа гласање не може да бидат варијанта на општествен консензус, изјави Киличдароглу.

Тој посочи дека референдумот се одржал во нечесни и нееднакви услови.

- Сите треба да го почитуваат законот, но луѓето од таборот на приврзаниците на измените ја минаа границата на законите. Со своите дејствија Централната изборна комисија ова гласање го направи крајно спорно, даде повод за сомневање во неговата легитимност, рече тој, имајќи го предвид решението на Врховната изборна комисија да ги прифати за валидни гласачките ливчиња, кои немале печат од нејзини официјални претставници.