Германската армија размислува за повлекување на своите авиони од турската база Инџирлик

Германија се уште сака нејзината армија да ја користи турската воздухопловна база Инџирлик за разузнавачки летови во борбата против „Исламска држава", но разгледува и алтернативни варијанти, поради спорот со Анкара, информира денеска германското Министерство за одбрана.

Портпаролот на Министерството изјави дека вооружените сили испитуваат други опции за стационираните шест разузнавачки авиони, авионот цистерна и 250 војници, во случај германските пратеници да гласаат за прекин на користењето на базата во Турција, поради одбивањето на Анкара да им дозволи да ја посетат.

Во јуни Турција не им дозволи на германски пратеници да ја посетат базата, откако односите меѓу двете земји се заладија поради резолуција на Бундестагот, со која убиствата на Ерменците во Отоманската империја беа оквалификувани како геноцид. Турција остро ја оспорува оваа дефиниција, инсистирајќи на тоа дека бројот на жртвите е надуен, а во услови на Првата светска војна жртви имало од сите страни.