ОН: Формиран фонд за борба против насилството врз децата

Генералниот секретар на ОН, Бан Ки-мун, денеска го објави создавањето на ново партнерство  и фонд, наменети за борба со насилството врз децата, пренесоа американските медиуми.

Бан го соопшти и создавањето на Глобално партнерство за прекин на насилството врз децата, што обединува влади, фондации, академски институции и приватниот сектор во обид да се прекине со злоупотребите, експлоатацијата, шверцот и насилството врз децата во вооружените конфликти.

Формиран е и труст за подршка на партнерството, во кој прв донатор е британската Влада, која додели 40 милиони фунти (околу 54 милиони долари).

Според податоците на американските Центри за контрола и превенција на заболувањата, над една милијарда деца низ светот преживеале физичко или психичко насилство, а едно од пет девојчиња барем еднаш во животот биле подложени на сексуално малтретирање.