Филмот „Види ја ти неа“ на Сиднеј и Палм Спрингс

Краткометражниот игран филм „Види ја ти неа“ во режија на Горан Столевски ќе биде прикажан на Интернационалниот филмски фестивал Палм Спрингс во САД и Филмскиот фестивал во Сиднеј, Австралија.

Палм Спрингс е најголемиот настан за кратки филмови во Северна Америка и добива околу 4.200 апликации од над 100 земји низ целиот свет. На овогодинешното издание во 90-минутни тематски програми ќе се прикажат околу 325 кратки филмови. Досега на фестивалот се прикажани повеќе од 100 кратки филмови кои добиле номинација или освоиле Оскар.

Филмот „Види ја ти неа“ досега освои Мала камера 300 на Интернационалниот фестивал на филмската камера “Браќа Манаки“, во Македонија, награда за најдобар краток филм на Филмски Фестивал Санденс, Гранд при награда на Мартовски фестивал-Белградски фестивал на документарен и краток филм и награда Уранија на LET’S CEE филмски фестивал, во Виена.

„Види ја ти неа“ е приказна за младата девојка Анета, која се обидува да ги реши проблемите во семејството и училиштето вклучувајќи се во еден исклучиво машки верски ритуал, скокање по крстот за Водици.

Улогите во филмот ги толкуваат Сара Климоска, Игор Ангелов, Пируника Киселички, Антонија Белазелкоска, Милица Стојанова, Жарко Јовановиќ, Иво Антов, Виктор Арсов, Симон Манасковски, Изабела Новотни и Горан Илиќ.

Сценариото за филмот е на Горан Столевски, кинематографер е Наум Доксевски, сценограф Влатко Чачоровски, костимограф Жаклина Крстевска, тонец Братислав Зафировски, а шминката е на Наталија Кајевска. Продуценти на филмот се  Димитар Минов, Кристијан Буровски и Томи Салковски.

Филмот е во продукција на Црна Мачка Продукција, во копродукција со Скопје Филм Студио, и финансиски подржан од Агенцијата за филм на РМ.