Фицо: Без право на вето на секоја членка нема да има Европска Унија

Словачкиот премиер Роберт Фицо изјави дека без правото на вето на секоја членка, нема да има Европска Унија.

Зборувајќи на настан на чешкото здружение „Светополук“ во Братислава, Фицо рече дека чешките и словачките претставници треба да разговараат за ставот за војната во Украина, како и за правото на вето во рамките на Европската Унија.

Според него, секоја земја-членка треба да има право на вето, бидејќи ако тоа не постои, како што рече, нема да има Европска Унија.

Фицо повика на оживување на преговорите меѓу словачката и чешката влада, но и на оживување на идејата за „Вишеградската четворка“ (В4), во која покрај Чешка и Словачка се и Унгарија и Полска.

- Можам да повторам во име на владата, во секое време, на кое било место во Словачка, на која било тема, владата е подготвена да преговара со нашиот партнер, чешката Влада, рече Фицо, истакнувајќи дека има многу теми за кои земјите треба да разговараат.

Тој рече дека групата „Вишеградска четворка“ во моментов е „политички мртва“ и тврди дека форматот бил „намерно прекинат“, пренесе ТАСР.

- Не станува збор за тоа што лидерите не се разбираат меѓусебно. Стануваше збор за постојан концентриран притисок од големите западни земји да ја распаднат В4 како силна регионална асоцијација, рече Фицо.