„Фич“ го задржа кредитниот рејтинг за Македонија, но прогнозираше понизок раст

Кредитната рејтинг агенција „Фич“ го потврди кредитниот рејтинг на земјава  ББ+. Во извештајот се наведува дека ваквата оцена е поткрепена со кредибилните и конзистентни политики, поддржани од долгогодишната стабилност на девизниот курс на денарот.

Сепак, Фич ги намали проекциите за раст на економијата во земјава, од 4,3% на 2,8%. Во извештајот се наведува дека и Македонија ги чувствува последиците од руско-украинскиот конфликт, кој и натаму ќе биде причина за раст на цените на основните производи и на енергенсите. А, тие сочинуваат над 50 отсто од потрошувачката кошничка.

Од „Фич“ оценуваат дека банкарскиот сектор остана силен покрај пандемискиот шок. Банкарскиот систем е во добра кондиција за да продолжи да овозможува силна кредитна поддршка на економијата.