ФФМ: Целосно ќе го исчистиме ѓубрето во македонскиот фудбал

Криминалните структури и ѓубрето во фудбалот целосно ќе бидат исчистени“, соопшти вечерва Фудбалската федерација на Македонија, откако ФК Гостивар го напушти теренот на натпреварот против Работнички во рамки на 29 коло во Првата македонска фудбалска лига (ПМФЛ), следејќи го примерот на Воска која во минатото коло се повлече од теренот на дуелот против Вардар.

„Очигледно е дека последните одлуки на Управниот одбор на ФФМ во кои јасно беше најавено расчистување со криминалот и корупцијата во македонскиот фудбал се директна причина за оваа срамна постапка.Тие кои со години беа навикнати на привилегии, денес, кога владеат правилниците, транспарентноста и фер-плејот, не можат да функционираат во регуларен систем“, се наведува во соопштението на ФФМ.

Истакнувајќи оти „регуларноста на ПМФЛ нема да биде нарушена и првенството ќе продолжи по правилата и прописите од натпреварувањето“, ФФМ порача дека „нема да дозволи уцени и притисоци“.

„Напротив, ФФМ ќе излезе уште посилна од овие координирани подземни постапки што интензивно се случуваат во последните денови. Воска и Гостивар нема да бидат тие што ќе го валкаат македонскиот фудбал. Тие не го создале овој фудбал за да имаат право да го уништуваат. Секако, ќе завршат таму каде што навистина заслужуваат. Нашата борба за чист фудбал нема враќање назад. Одиме до крај за регуларен, чесен и достоинствен македонски фудбал“, се наведува во соопштението од Куќата на фудбалот.