Еве како џихадистите бегаат од Русите

Припадниците на Исламската држава се кријат во џамии, а локалните жители ги користат како жив штит затоа што знаат дека руските авиони никогаш нема да бомбардираат области со цивилно население, соопшти висок функционер од руското министерство за одбрана.

„Припадниците на ИСИЛ се кријат во џамии, а своите возила ги паркираат околу нив. Тие знаат дека ние ги почитуваме џамиите и дека под било какви околности, ние нема да нападнеме цивилна област“, изјави заменик министерот за одбрана, Анатолиј Антонов, пренесува "Russia Today".

Антонов истакна дека руската војска внимателно ги проверува податоците од разузнавачките служби пред да започне со бомбардирањата.

„Стотина пати ги проверуваме податоците од разузнавачките служби и започнуваме со операциите кога ќе бидеме 100% сигурни дека напаѓаме мета“, истакна Антонов.

„Денес имаме податоци дека терористите се кријат во џамиите. Имаме податоци, видео-податоци дека терористите ги кријат своите оружја околу и во џамиите. Тие знаат дека ние ги почитуваме и се грижиме за џамиите и дека нема да нанесеме удари кон невоени објекти“, порача Антонов.