Ердоган: Турција ќе ги прекине односите со Израел ако Ерусалим биде признат за израелски глаевн град

Евентуалното признавање на Ерусалим за израелски главен град од страна на САД, може да доведе до прекин на односите меѓу Турција и Израел, најави денеска турскиот претседател Реџеп Тајип Ердоган. 

- Ќе ја водиме таа битка решително и до крај. Тоа може да доведе до прекин на нашите дипломатски односи со Израел, изјави Ердоган, додавајќи дека статусот на Ерусалим е „црвена линија за муслиманите“. 

Портпаролот на турската Влада, Бекир Боздаг вчера изјави дека промената на „историскиот статус“ на Ерусалим би предизвикала „голема катастрофа“ и би „означила крај на мировниот процес“ на Блискиот Исток.

- Таквата одлука на американската Администрација би го отворила патот кон нови конфликти, нови спорови, дополнителна нестабилност на регионот и кон непредвиливи случувања, порача Боздаг.

Минатата недела Белата куќа соопшти дека американскиот претседател Доналд Трамп размислува да го пресели седиштето на Амбасадата на САД во Израел од Тел Авив во Ерусалим, што практично би значело негово признавање за израелски главен град. 

Зетот и близок советник на Трамп, Џаред Кушнер, во неделата изјави дека американскиот преседател се уште не донел одлука за премествање на Амбасадата на САД во Израел од Тел Авив во Ерусалим, по што синоќа Белата куќа информира дека засега се одлага донесувањето на ваквото решение. 

Претставникот на Белата куќа, Хоган Гидли, наведе дека донесувањето на одлуката е одложено. - Претседателот беше јасен во однос на таа тема од самиот почеток: прашањето не е дали, туку кога, истакна Гидли, додавајќи дека одлуката ќе биде донесена во скоро време. 

Во 1995 година Конгресот на САД усвои закон за преместување на Амбасадата на САД од Тел Авив во Ерусалим. Оттогаш американските претседатели на секои шест месеци потпишуваат наредба за одлагање на извршувањето на таа одлука.