ЕП - Хрватска 2018: Црна Гора 49.ти ривал на македонските ракометари

Македонската ракометна репрезентација вечерва во 20:30 часот во Арена Загреб го игра вториот дуел на Европскиот шампионат во Хрватска. Противник ни е селекцијата на Црна Гора.

Ова е 49-та репрезентација против која ќе играме официјален натпревар на ЕП, СП, Олимписки квалификации и квалификации. Досега со Црногорците немаме одиграно официјален дуел, иако во многу наврати имаме играно пријателски натпревари.

Во пресрет на вечерашниот дуел во таборот на Македонија нема промена во составот. На повреда се жали Филип Миркуловски, што значи дека неговиот настап е неизвесен, но популарниот „Жути“ на вчерашниот тренинг изјави дека и покрај отокот на зглобот ќе направи напори за да игра. Станува збор за негова хронична повреда.

Во составот на Црна Гора ќе има една промена и за денеска е пријавен Небојша Симиќ (голман). Поради повреда првенството ќе го пропушти играчот на Вардар Вуко Борозан.

Ова за Македонија е 197 официјален натпревар, а со победа сигурно ќе биде обезбеден пласман во следната фаза, која нашите ракометари би ја играле во Вараждин.