„Експрес“: Ердоган сака атомска бомба

Турскиот претседател Реџеп Таип Ердоган сака да се стекне со атомска бомба, пишува денеска грчкиот весник „Димократија“, повикувајќи се на британскиот весник „Експрес.

Според весникот, Ердоган сака да ја претвори Турција во нова нуклеарна сила и тој има таен план за нуклеарна бомба во момент, кога односите со ЕУ се критични.

Ова предупредување било упатено во весникот „Експрес“ од турскиот новинар Абдула Бозкурт.

Во написот се тврди дека луѓе блиски до опкружувањето на Ердоган, кои имаат влијание врз неговите одлуки, изјавиле дека турскиот претседател веќе ја разгледал можноста за стекнување со атомска бомба. 

Стравувањата на турскиот новинар се потвдени и од Ајкан Ердемир, турски експерт од американската фондација за заштита на демократијата и поранешен член на турскиот Парламент.

Тој изјави дека Ердоган имал голема желба да ја претвори Турција во нуклеарна сила, но немал можност тоа да го направи.

Според него по неуспешниот преврат плановите на Ердоган се осуетиле. 

- Турција страда од недостиг на финансиски ресурси, а исто така и од недостиг од персонал за еден толку скап и високотехнолошки експеримент, изјави експертот.