Еколошки хепенинг во Крива Паланка

По повод Зелената недела на Европска унија 2016, во градскиот парк во Крива Паланка денеска се одржа манифестацијата „Еколошки хепенинг“, која ја организираше ЕУ-инфо точката од општината, во соработка со ЕУ- инфоцентарот при Делегацијата на ЕУ во Република Македонија.

- Еколошкиот хепенинг се одржа под мотото „Инвестирање во зелената иднина“ и вклучи повеќе компоненти: сценско-музички точки, еколошки рецитал, еколошки пораки, делење едукативни флаери и летоци, како и целодневен ликовен хепенинг со еколошка содржина, информира Лидија Митовска, одговорна од ЕУ-инфо точката од општина Крива Паланка.

На манифестацијата учествуваа учениците од сновното општинско училиште „Илинден“ и членовите на ликовниот клуб при НУ Центар за култура, Крива Паланка.

Пред присутните се обрати градоначалникот на општина Крива Паланка, Арсенчо Алексовски, кој истакна дека соработката со Европската унија се остварува на повеќе полиња, меѓу кои е и областа на екологијата.

Тој посочи дека овој еколошки настан е во насока на валоризирање на еколошките вредности, со цел да се даде придонес за зелената иднина и за зелена општина Крива Паланка.

На еколошкиот хепенинг му претходеа неколку работилници со учениците од ООУ „Илинден“ , а настанот беше дел од бројните пригодни активности за одбележување на зелената недела на ЕУ 2016 во Крива Паланка.