Џафери за секој случај стави барикада пред расправата за јазиците

За денеска е закажана седницата во македонското Собрание на која точна на дневен ред е и Законот за јазиците, за кој опозициската ВМРО-ДПМНЕ има поднесено 35.000 амандмани, што е рекорден број за било кој закон до сега.

Никој од пратениците не знае дали претседателот на Собранието Талат Џафери ќе ја отвори расправата за Законот за употреба на јазиците во трето читање, но за секој случај Џафери за да се заштити стави заштитна преграда на местото каде што му стои картичката за евиденција на гласањето за да не може никој да му ја земе, јавува Сакамдакажам.

Таков случај имаше минатиот август, кога пратеникот на ВМРО-ДПМНЕ Илија Димовски му ја извади картичката на Џафери, па спикерот го повика обезбедување.

Извори од владејачкото мнозинство за САКАМДАКАЖАМ.МК велат дека не очекуваат Џафери да ја отвори расправата за јазиците без претходно да има договор со ВМРО-ДПМНЕ за поднесените амандмани.

„Негово е правото дали ќе отвори расправа или не за Законот за употреба на јазиците. Прво треба да ги поминеме останатите точки, за кои треба само да се гласа, а дали ќе се врати на точката за Законот за употреба на јазици или ќе ја отвори другата најавена седница само претседателот одлучува. Не верувам дека без договор со опозицијата, Џафери ќе ја отвори расправата, влогот е голем“, велат од мнозинството.